Алматы қаласының Мәслихат депутаттығына Жетісу ауданынан үміткер
Алматы қаласының Мәслихат депутаттығына Жетісу ауданынан үміткер
Құрметті сайлаушылар!
Менің сайлауалды бағдарламам қаламыздың және оның ішіндегі Жетісу ауданының ең көкейкесті мәселелерін қамтиды. Бұларсыз қазіргі заманауи қала өмірі мүмкін емес. Атап айтсам:
01
Қауіпсіздік
Ауданымыздың тұрғындары таза, жарық әрі қауіпсіз көшелермен жүріп, балаларын жайлы аулалар мен әсем саябақтарда серуендетуге тиіс. Айнала толы қоқыс, қираған жол болса, өскелең ұрпақты тазалыққа, тиянақтылыққа, жауапкершілікке баулу өте қиын екені анық. Осы өзекті мәселелерді құзырлы органдар тарапынан жедел түрде шешуге барынша ықпал етуге әзір екенімді растаймын. Ауданымызды көркейту мен жайлы ету жолындағы менің кәсіпкер және жалпы қала өміріне немқұрайлы қарамайтын азамат ретіндегі нақты қадамым есебінде өз атымнан Жетісу ауданында бес жылда бес жастар воркаут алаңын салып беруге уәде беремін.
Сондай-ақ, бүкіл әлемде қауіпсіздіктің негізгі құралы болып табылатын бейнебақылау камераларымен ауданымызды барынша қамту жұмысын тез арада жүзеге асыруға ықпал ететін боламын;
02
Сумен қамту
Ауданымыздың ең көкейкесті қиындықтарының бірі — әбден тозығы жеткен су құбырлары мен канализация желілері. Олардың басым көпшілігінің жасы бүгінде 60-70 жылдан асып отыр. Бүкіл әлем 21 ғасырдың жетістіктеріне бөленіп жатқанда, мұндай күйкі жағдай, әрине, түсініксіз әрі ұят. Тұрғындарымыз негізгі тұрмыстық қажеттіктерін өтей алмай жүрген жағдайда қандай да бір жоғарғы жетістікке ұмтылу мүмкін емесі хақ. Сондықтан да, тиісті мемлекет органдарымен бірлесе отырып, бұл өзекті мәселені шұғыл түрде шешуге бар күш-қуатымызды саламыз. Атап айтқанда, осы жаздан қалмай тиісті күрделі жөндеу жұмыстарын бастауды талап ететін боламыз;
03
Сейсмикалық қауіпсіздікті арттыру
Инженерлік коммуникациялардың тозуымен қатар ауданымыздың көркін құртып отырған және, ең бастысы, Алматының сейсмикалық жағдайында азаматтарымызға орасан қауіп төндіріп отырған күрделі бір мәселе — ескірген тұрғын үйлер. Қазірдің өзінде ауданымызда 200-ге жуық осындай нысан бар. Осы бағыттағы қала әкімшілігі жүргізіп отырған жұмысты барынша жеделдету және тұрғындарды апаттық жағдайдағы үйлерден көшіру мен оларды лайықты баспанамен қамтамасыз ету аса маңызды деп есептейміз;
04
Бизнесті қолдау
Шағын және орта бизнесті дамыту, жаңа жұмыс орындарын ашу, азаматтарымыздың қаржылық сауаттылығын арттыру — менің орасан тәжірибе мен біліктілік жинаған салам. Жетісу ауданы тұрғындарының бизнес ашуға және оны жүргізуге барлық мүмкіндіктері, яғни қолжетімді қаржы, кәсіпкерлік бағдарламалар және мемлекет тарапынан еселі қолдау болу қажет;
05
Білім беру нысандарының сапасын арттыру
Балаларымыздың сапалы білімі, заманауи мектептер мен балабақшалар — жарқын болашағымыздың іргелі алғышарты. Ауданымыздың халық саны өсуде, олай болса әр бүлдіршініміз лайықты білім беру орнында сапалы біліммен қамтылу керек. Сәйкесінше, ең бірінші кезекте мектеп орындарының жетіспеушілігі мен оқушылар саны шектен асқан кластар мәселесін шұғыл шешуге кірісетін боламын. Мәселен, №148 мектепке 300 орындық қосымша ғимарат құрылысын, сондай-ақ №112, №103 мектептерді жапсырма салу арқылы кеңейту жұмыстарын жеке бақылауыма алуға уәде беремін;
06
Медициналық қызметті жақсарту
Жайлы өмірдің және бір ажырамас бөлігі — жоғарғы дәрежедегі медициналық қызмет, тиісті деңгейдегі ауруханалар мен емханалар. Денсаулық сақтау саласындағы әлемдік технологиялар күннен күнге дамып келе жатқанда, ешбір Жетісу ауданының тұрғыны осы үрдістерден тыс қалмау керек. Бірінші кезекте «Саяхат» а/б мен Жұмысшылар қалашығы маңындағы тұрғындарды сапалы да заманауи емханалармен қамтамасыз ету, сонымен қатар «Құлагер» ықшам ауданының алғашқы емдеу-санитарлық көмек орталығын кеңейту жұмыстарын шұғыл түрде шешуге нық ниетімізді білдіреміз.
Пікір қалдыру
Кандидат жайлы
Тастекеев Дулат Тұрсынұлы, 1982 ж. 22 маусымында Семей (қазіргі Абай) облысының Ақсуат ауданына қарасты Екпін ауылында қарапайым ауыл тұрғындарының отбасында дүниеге келген.
Бастауыш мектепті туған ауылымда тамамдаған соң, орта білімді Алматы қаласының Абай атындағы дарынды балаларға арналған республикалық мектеп-интернатында алып, оны 1999 ж. бітірген. Жоғарғы білім алу жолында Экономика және құқық институтын (2003 ж.), Қазақ мемлекеттік заң университетін (2007 ж.), Францияның HEC бизнес мектебін (2009 ж.), Мәскеудің «Сколково» басқару мектебін (2015, 2019 жж.) сәтімен аяқтаған. 2019 ж. «Нархоз» университетінің «Бизнесті басқару» мамандығы бойынша доктор (Ph.D.) дәрежесін иеленді. 2022 жылдан бері АҚШ-тың Гарвард бизнес мектебінде дәріс алып жатыр.
Кәсіби еңбегін 2003 ж. еліміздің қаржы-банк ұйымдарында басталып, 2010 жылдан қазірге дейін «TAS GROUP» компаниясының негізін қалаушысы әрі басқарушысы, «ASSYLTAS» қоғамдық қорының құрылтайшысы қызметін атқарып келеді.
Соңғы бірталай жылда еңбегінің ерекше бағыты — инфрақұрылымды дамыту, қаржылық сауаттылықты арттыру, шағын бизнесті қолдау, жастар спортын көтеру, сондай-ақ қазақтың ұлттық мәдениетін жандандыру жобаларын бастап, оларға қайырымдылық көмек көрсету.
Кез келген алматылық сияқты мен де жайлы қалада өмір сүріп, жайлы қалада балаларымды өсіргім келеді. Сол себепті де, нақты күшім мен мүмкіндігімнің барын ескере отырып, әсем қаламыздың тұрғындарының мүдделерін мемлекет алдында қорғау арқылы азаматтық борышымды өтеу мақсатында мен Алматы қаласы Мәслихаты сайлауына түсуді жөн көріп отырмын.
Халықпен кездесу
